فكفكة

السلام عليكم يا أهل المدونات 

ليكوا وحشة والله. اسفة علي الغيبة الطويييلة بس ظروف بقي.  ألف ألف شكر للأخ عبد الرحمن اللي افتكرني بتعليق زي السكر. شكلي مش هاكتب لحد غيرك يا أخ عبد الرحمن لأن مفيش حد تاني عبرني. عموما مش مشكلة، بلوج ورا بلوج يأتي الله بالفرج

عودة للكتابة السريالية.  انا طالبة في قسم اللغة الانجليزية بإحدي كليات الاداب. ناس بتقولي حلوة اوي الدراسة في كلية الاداب، وناس تاني بتقول ايه يا بنتي اللي رماكي علي الهم ده- وانا طبعا مع الرأي التاني.  طيب السؤال بقي اللي بيطرح نفسه في هذا الموقف اللي ما يعلم بيه الا ربنا " انا دخلت الكلية دي ليا؟"  و " هو انا كنت عايزة ادخل ايه؟". يقال، والعهدة علي الراوي، اني كنت عايزة ادخل طب او صندلة- وفي رواية اخري صيدلة- وده طبعا تلبية لرغبات بابا وماما وباقي العيلة في ما يطلبه الاهالي من الممتحنون. جيت انا بقي في ثانوية عامة- الله يحرقها بجااااااااااااااااااز- اديت الكل بمبة وجبت 92% علمي -مش عايزة تريقة من حد- طبعا المجموع ده مايدخلنيش طب انما ممكن يدخلني مستشفي المجانين  من كتر تريقة بابا وماما عليا. طب مجموعي الجبار يوديني فين تاني؟؟؟؟ قلت علوم قالوا صعبة وماتنفعش وعلي ايه التعب، مع اني كنت هاموووووووت وادخل الكلية دي قسم جيلوجيا علشان كنت فاكره الطلبة فيها بيدرسوا فضاء…. والله كان نفسي ابقي زي الباز كده مثلا، عالم قد الدنيا - الا صحيح هو دكتور الباز دخل كلية ايه؟؟؟ المهم اني بعد ما عرفت ان الطلبة في جيلوجيا مش بيدرسوا غير طبقات الارض و طلع نأبي علي شون

أنا هابتدي اكتب. كل اللي هايجي علي بالي هاكتبه حتي لو الكلام مش مترابط، مش مهم، هايطلع سريالي وايه يعني، اهي حاجة جديدة. الكلام هايطلع ناقص، بس برضه هاكتبه ناقص. ما هو انا لازم اتعود اكتب علشان اعرف عقلي بيفكر ازاي وعايز مني ايه بالظبط. أنا مين وهو فيه ايه في حياتي بالظبط. المبسوطة دايما اللي من بره دي ليه دايما حزينة من جوه. هو لو بابا وماما شافوا اللي باكتبه ده - وده من رابع المستحيلات- هايقولوا عليا ايه؟ مجنونة وهايفة ولا مريضة نفسية؟

انا مش عايزة حد يقوللي كلامك مش مترابط لأني مش هاكتب كلام مترابط. انا هاكتب اللي نفسي فيه من غير خوف ان حد يشوفه علشان ماحدش هايعرفني هنا_ ربنا يخلي المدونات والله بنتفع_ هنا مفيش خوف من اهلي

علي فكرة انا مش هاغير اللي بكتبه اول مرة الا اذا كان فيه غلطة إملائية اما اني احذف كلام فلأ. تقريبا السرياليين هما اللي كده برضوا، مش بيغيروا اللي كتبوه او رسموه لأنه في اعتقادهم هي دي الطبيعة والفطرة_ هم السرياليين برضه ولا مين؟ انا حاسة اني بكتب هبل بس مش مشكلة هبل هبل بس اديني بكتب وخلاص بدل ما اتجنن 

حد عنده علاج للخيال؟  انا خيالي هاوديني في داهية وبسببه حاسة اني مريضة نفسية -علي فكرة دي مش حاجة وحشة زي ما الناس فاكرة، زيي زي الل